Robert Kaplan — amerikalik mashhur yozuvchi, tahlilchi va jurnalist bo‘lib, u geosiyosat va xalqaro munosabatlar sohasidagi bebaho asarlari bilan keng tanilgan. Kar'erasi davomida u The Atlantic, Foreign Policy va The Wall Street Journal kabi nufuzli nashrlar bilan hamkorlik qilgan. Kaplan o‘zining ilmiy-amaliy tadqiqotlarida Markaziy Osiyo, Yaqin Sharq, Bolqon va Sharqiy Osiyo kabi muhim mintaqalarning jahon siyosatidagi o‘rnini, shuningdek, ushbu mintaqalardagi AQShning ta'sirini o‘rganishga alohida e'tibor qaratgan. Kaplanning «Bolqon sharpalari» va «Geografiyaning qasosi» kabi kitoblarida davlatlarning tashqi siyosiy qarorlariga ta'sir ko‘rsatuvchi tarixiy, madaniy va geografik omillar chuqur tahlil qilinadi. U mamlakatlarning siyosiy qadamlarini belgilaydigan geografik to‘siqlar, tarixiy an'analar va sivilizasion qadriyatlarning ahamiyatini ochib beradi. Kaplan realizm nazariyasining ishonchli tarafdori sifatida tanilgan bo‘lib, u xalqaro munosabatlarga davlatlar o‘rtasidagi muqarrar raqobat va manfaatlar prizmasi orqali yondashadi.